Raunveruleikastjarnan Khloé Kardashian opnar sig um þyngdartap sitt. Hún segir frá hvernig henni tókst að missa 27 kíló eftir fæðingu dóttur sinnar, True Thompson.

Khloé og systir hennar Kourtney Kardashian ræða málin í myndbandi fyrir Poosh, lífsstílsfyrirtæki Kourtney.

Khloé hefur margoft rætt um þyngdartap sitt, en hún hefur aldrei sagt hver lykillinn sé að árangrinum, fyrr en núna.

Haldast hönd í hönd

Khloé eignaðist dóttur sína, True Thompson, í apríl 2018. Hún segir að þetta snúist um að taka mataræðið í gegn en einnig verja tíma í ræktinni.

„Ef þú ert að reyna að léttast töluvert þá haldast mataræði og hreyfing hönd í hönd,“ segir hún.

„Núna er nálægt mínu þyngdarmarkmiði. Ég er í kringum 68 kíló, stundum aðeins meira. Þegar ég fer aðeins neðar er ég alveg: Vá þetta er draumurinn.“

Ekki eins ströng með mataræði

Khloé segist ekki vera eins ströng og hún var þegar kemur að mataræði. Hún segist ekki „passa“ hvað hún borðar þessa dagana í miðjum heimsfaraldri.

„Það þýðir samt ekki að ég sé að borða snakk allan daginn. Ég fylgi heilbrigðu mataræði. Ég elska quesadillas. Ég elska allt sem True borðar,“ segir hún.

Khloé segist ekki vilja hugsa of mikið um það sem hún borðar því hún vill ekki „lifa ömurlegu lífi“ þar sem hún „neitar sér um mat“ sem hún elskar.

„Þú veist aldrei hvort morgundagurinn kemur. Ég vil miklu frekar eyða meiri orku í ræktinni en eldhúsinu,“ segir hún.

Kourtney tekur undir með Khloé en bætir við að ketó-mataræðið og tímabundin fasta (e. intermittent fasting) hafa virkað best fyrir hana.

Að lokum segir Khloé:

„Þegar þú nærð þínu markmiði þá er það í lagi að viðhalda bara þyngdartapinu, og að viðhalda þýðir ekki að afneita þér um allt sem er gott. Þú verður að fá þér köku ef hún er í boði!“