Nicole Bernardocchi ætlaði að hafa það notalegt í gufu í sundlaug í heimabæ sínum í Bretlandi. Sundferðin var hinsvegar allt annað en ánægjuleg, en henni var sagt að vinsamlegast hylja sig því sundföt hennar væru of „kynþokkafull.“
Nicole, 23 ára, var í svörtum sundbol og segir að það hafi verið „öfundsjúkar mæður“ sem hafi kvartað undan henni. Hún segir frá þessu í samtali við The Sun.
„Ég fékk nokkur skrýtin augnaráð frá mömmunum í mátunarklefunum áður en ég fór í gufuna, en ég pældi ekkert í því. Konan í móttökunni var vingjarnleg og leyfði okkur að borga minna en venjulega því það voru börn í sundskóla á sama tíma,“ segir hún.
„Ég hélt fyrst að kortið hafi ekki farið í gegn þegar konan í móttökunni bað um að fá að tala við mig fyrir utan. En ég var hneyksluð þegar hún sagði mér að nokkrar mömmur hafi kvartað yfir því að sundföt mín væru óviðeigandi og ég þyrfti að ná mér í handklæði. Þetta var vandræðalegt, að vera dregin til hliðar af starfsmanni þegar það var fleira fólk í gufunni.“
Nicole neitaði að fara að ná í handklæði og fór í mátunarklefann.
„Ég skammaðist mín. Ég ætlaði ekki aftur í gufuna. Mér finnst þetta vera mismunun, það sást ekkert og ef ég hefði verið stærri þá held ég ekki að þær hefðu kvartað. Unnusti minn sagði við mig að þetta hafi verið fordómar gagnvart líkamanum mínum og það er ekki í lagi. Mér leið hræðilega eftir þetta. Ég vildi ekki fara en þetta var svo vandræðalegt,“ segir hún.
„Bara því ég er kynþokkafull þá þýðir það ekki að ég sé óviðeigandi fyrir sundlaugina. Ég var ekki að sýna kynfærin mín eða brjóstin mín,“ segir hún.
The Sun hafði samband við rekstrarstjóra sundlaugarinnar sem neitaði að tjá sig um málið.