Dr. Amie Harwick, vel þekktur fjölskyldu- og kynlífsráðgjafi í Hollywood, fannst látin við heimili sitt á laugardag. Grunur leikur á að henni hafi verið ráðinn bani. Amie kom meðal annars fram í heimildarmyndinni Addicted to Sexting sem kom út árið 2015 og vakti talsverða athygli.
Það var snemma að morgni laugardags að nágrannar Amie í Hollywood Hills urðu varir við hróp konu. Þegar lögregla kom á staðinn fannst Amie meðvitundarlaus fyrir utan heimili sitt, en talið er að henni hafi verið hrint niður af svölum á þriðju hæð. Amie var flutt á sjúkrahús þar sem hún lést af sárum sínum.
Lögregla segir að allt bendi til þess að brotist hafi verið inn til hennar og til átaka hafi komið sem hafi endað með fyrrgreindum afleiðingum. Fyrrverandi kærasti Amie liggur undir grun í málinu, en sá heitir Gareth Pursehouse og er 41 árs gamall. Amie hafði fengið nálgunarbann gegn honum og í frétt TMZ kemur fram að hún hafi óttast um öryggi sitt í návist hans. Gareth var handtekinn vegna málsins síðdegis á laugardag.
Amie var trúlofuð bandaríska gamanleikaranum Drew Carey ekki alls fyrir löngu en þau hættu saman árið 2018. Carey sagði í yfirlýsingu til bandarískra fjölmiðla að hann væri miður sín vegna andláts Amie. Hún hafi haft jákvæð áhrif á alla í kringum sig og verið mjög umhugað um starfsferil sinn. Þá hafi hún verið frábær fyrirmynd fyrir konur um allan heim.
Amie var 38 ára þegar hún lést.
