Óhætt er að segja að kona ein í Massachusetts í Bandaríkjunum hafi fengið meira en hún bað um þegar hún fór á stefnumót með manni að nafni Christopher Castillo.
Konan hafði kynnst Castillo á stefnumótaforriti og fór svo að þau hittust þann 5. desember 2016. Hún sótti hann á heimili foreldra hans og hugðust þau gera sér glaðan dag saman. Castillo bað konuna um að koma við í banka sem var svo sem ekkert endilega óvenjulegt.
Það sem gerðist þegar Castillo kom út úr bankanum er eitthvað sem konan gleymir eflaust aldrei. Með skammbyssu og fullar hendur af peningum sagði Castillo konunni að keyra af stað undir eins, eða „f—ing go” eins og hann orðaði það pent samkvæmt konunni.
Konan gerði það sem Castillo bað um og ók af stað. Lögreglan var þó ekki lengi að stöðva bifreiðina og lék grunur á í fyrstu að hún hefði verið með Castillo í ráðum. Við rannsókn málsins kom í ljós að konan var blásaklaus og í raun skelfilega óheppin.
Castillo var dæmdur í fimm ára fangelsi vegna málsins í síðustu viku; þrjú ár fyrir bankaránið og tvö ár fyrir að ráðast á tvo lögregluþjóna. Castillo komst undan með þúsund dollara, rúmar 100 þúsund krónur, úr ráninu.