Bandaríski körfuboltakappinn Kobe Bryant og þrettán ára dóttir hans, Gianna Maria Onore, létust í þyrluslysi í Calabasas í Bandaríkjunum á sunnudaginn síðastliðinn. Kobe var einn besti körfuboltamaður sögunnar og var 41 árs þegar hann lést. Heimurinn syrgir nú andlát hans. Alls fórust níu í slysinu.
Sjá einnig: Kobe Bryant látinn eftir þyrluslys
Kobe Bryant skilur eftir sig eiginkonu sína Vanessu og dæturnar Natalia Bryant, 17 ára, Bianka Bryant, 3 ára, og Capri Bryant, 7 mánaða.
Vanessa Bryant hefur nú tjáð sig í fyrsta skipti um harmleikinn. Hún gerir það í einlægri og fallegri færslu á Instagram.
„Ég og dætur mínar viljum þakka þeim milljónum manna sem hafa sýnt okkur stuðning og ást á þessum hræðilega tíma. Takk fyrir allar bænirnar. Við klárlega þurfum á þeim að halda. Við erum niðurbrotnar eftir að hafa skyndilega misst yndislega eiginmann minn, Kobe – sem var ótrúlegur faðir; og fallegu, ljúfu Giönnu – ástrík, hugulsöm og yndisleg dóttir og frábær systir Nataliu, Biönku og Capri,“ skrifar Vanessa og deilir fallegri fjölskyldumynd með færslunni.
Sjá einnig: Hjartnæma ástæðan fyrir því að Kobe Bryant ferðaðist með þyrlu
Vanessa minnist einnig hinna sem létust í slysinu.
„Orð geta ekki lýst sársaukanum sem við erum að upplifa. Það veitir mér ákveðna huggun að vita að bæði Kobe og Gigi vissu að þau væru svo elskuð. Við vorum svo ótrúlega blessuð að hafa þau í lífi okkar. Ég vildi óska þess að þau gætu verið með okkur að eilífu. Þau voru tekin of snemma frá okkur.“
Vanessa segist ekki vera viss hvað framtíðin ber í skauti sér. „Það er ómögulegt að ímynda sér líf án þeirra. En við vöknum hvern dag og reyndum að halda áfram því Kobe og yndislega Gigi eru að skína ljósi sínu á okkur.“
Þá segist Vanessa vilja gera allt sem í hennar valdi stendur til að aðstoða aðstandendur hinna sem létust í slysinu. Hefur hún hrundið af stað söfnun fyrir þau, eins og fram kemur í færslunni sem má lesa í heild hér að neðan.