Nassly Sales, móðir í New Jersey í Bandaríkjunum, hefur lagt í vana sinn að kaupa bleyjur fyrir tvær dætur sínar á söluvefnum Amazon. Nassly hefur haft ágæta reynslu af þessu, enda verðið bæði hagstætt og varan tilbúin til afgreiðslu fljótt.
Það sem meira er þá býður Amazon viðskiptavinum sínum að kaupa vörur á afslætti sem búið er að skila eða eru gallaðar að einhverju leyti.
Nassly keypti tvo kassa af bleyjum með afslætti en hana hefur eflaust ekki grunað að bleyjurnar sem hún keypti væru notaðar. Hún komst að því nótt eina í liðinni viku þegar hún þurfti að skipa um á dóttur sinni sem kom í heiminn löngu fyrir tímann fyrr í vetur.
„Ég tók bleyjurnar upp og veitt því athygli að þær voru dálítið þungar. Ég var samt hálfsofandi og ljósin voru slökkt. Ég kveikti ljósin og það var þá sem ég sá að bleyjurnar voru notaðar,“ segir Nassly sem segir það ekki hafa farið á milli mála. Lyktin sem gaus upp fari ekki fram hjá neinum.
Nassly og maður hennar, Sid Mukherje, höfðu samband við Amazon í kjölfarið og þau eru ekki mjög ánægð með viðbrögðin sem þau fengu. Amazon hafi beðist velvirðingar á óþægindunum og boðið þeim endurgreiðslu. Þau þyrftu þó ekki að hafa fyrir því að skila bleyjunum, eðlilega kannski.
Þau hafa kallað eftir því að forsvarsmenn Amazon svari því hvernig svona geti gerst. Talsmaður Amazon segir við ABC News að fyrirtækið harmi atvikið mjög og það verði rannsakað ofan í þaula svo það endurtaki sig ekki.