Erna Kristín Stefánsdóttir, betur þekkt sem Ernuland, hefur vakið mikla athygli í baráttunni fyrir líkamsvirðingu. DV fannst tilvalið að lesa í tarotspil Ernu og sjá hvað framtíðin ber í skauti sér á nýju ári, en lesendum DV er bent á að þeir geta sjálfir dregið tarotspil á vef DV.
Fyrst er það 9 sverð. Það táknar að þótt Erna Kristín beri sig vel og virðist full af sjálfsöryggi, ber hún enn þungar byrðar úr fortíð sinni sem hún hefur ekki gert almennilega upp. Hún þarf að takast á við drauga fortíðar svo hún geti blómstrað í nútíðinni. Þá þarf hún einnig að hætta að búa til ímyndaðar hindranir á vegi hennar. Erna Kristín á það til að taka nærri sér skoðanir annarra en það tefur aðeins fyrir henni og velferð hennar. Svo virðist sem kvíði og neikvæðni einkenni líf Ernu Kristínar næstu vikur og hún verður að minna sig á að hún er fullfær um að hreinsa hugann og gera upp gamlar skuldir.
Næsta spil er 6 stafir. Það táknar að Erna Kristín hefur lagt sig gríðarlega mikið fram síðustu mánuði og ár. Það hefur vissulega tekið á og oft hefur hún verið við það að gefast upp. Það styttist hins vegar í að hún nái að njóta erfiðisins. Hún fær viðurkenningu fyrir störf sín og fær einnig góðar fréttir tengdar einkalífinu. Hún gerir sér sífellt betur grein fyrir því að hún verði að vera 100% einlæg við sig og fylgjendur sína ef hún ætlar að ná jafn langt og hún þráir. Því fyrr sem hún lifir eftir því, því betra.
Loks er það 5 mynt. Það táknar nútíðina en fjárhagsáhyggjur eru að plaga Ernu Kristínu og hún á jafnvel erfiðara með að finna verkefni en áður. Þá er einhver fátækt einnig sem umlykur andlegu hliðina og þarf Erna Kristín hugsanlega á nýrri áskorun að halda. Hún þarfnast eflaust ástar, umhyggju og ekki síður athygli um þessar mundir en ætti reyndar að leita betur innra með sér. Með því að gera það finnur hún ný tækifæri sem tengjast framtíðinni og öðlast þannig skilning á tilgangi lífsins. Erna Kristín á góða að og hjálpin er nærri ef hún þarf hana.
