Á meðan þú sefur skríða köngulær eftir koddanum þínum og inn í munninn þinn og þú kyngir þeim. Allt gerist þetta án þess að þú verðir þess var. En getur verið að þetta sé satt? Er þetta kannski bara mýta? Eða er þetta ein af þessum staðreyndum sem við getum eiginlega alveg lifað án þess að vita nánar um?

Svarið við þessu öllu er að við borðum ekki köngulær á meðan við sofum. Þetta er einfaldlega gömul mýta sem hefur lifað mjög lengi í munnmælum og auðvitað á internetinu eftir að það kom fram á sjónarsviðið.

Köngulær ganga ekki sjálfviljugar inn í munn fólks og þær vilja ekki vera í rúmum fólks, að minnsta kosti ekki á meðan fólk er í rúmunum. Köngulær vilja vera í ró og næði og þær vilja ekki láta trufla sig með einhverju brölti og byltum sofandi fólks.

Þær geta auðvitað dottið ofan í rúm fólks þegar þær eru á veiðum en það er þá ekki þannig að þær hafi ætlað sér að enda þar.

Sumir telja að það séu sérstaklega margar köngulær í svefnherbergjum fólks en svo er ekki. Þær gera ekki upp á milli herbergja í húsum, þær leita einfaldlega að góðum felustöðum þar sem þær verða ekki fyrir truflunum eftir því sem segir í umfjöllun Jótlandspóstsins. Ef þú sérð köngulær oftar í svefnherberginu en í öðrum herbergjum hússins þá getur skýringin verið sú að köngulær eru mjög virkar á nóttinni og þar höldum við okkur yfirleitt að næturlagi. Þessi sama skýring getur einmitt átt við ef þú sér köngulær á baðherberginu á nóttinni.

Á daginn fela köngulær sig fyrir versta óvini sínum í náttúrunni en það eru fuglar en þeir veiða að deginum. Þegar sólin sest skríða köngulærnar úr fylgsnum sínum og fara að sinna sínum málum og þess vegna sjáum við þær oft að kvöld- og næturlagi.