Samkvæmt nýrri rannsókn sem gerð var af Chicago-háskóla og eHarmony.com hefur um þriðjungur para sem gifti sig í dag byrjað saman á internetinu.
Niðustöðurnar segja að netið sé vinsælasti staðurinn til að finna maka þökk sé þeim mörgu leiðum sem hægt sé að nota til að komast í tæri við annað fólk.
Netið verður sífellt stærri hluti af lífi fólks sem eyðir æ meiri tíma í samfélagsmiðla, tölvupóst, spjallforrit, tölvuleiki og sýndarveruleika þar sem hægt er að „lifa“ í gegnum tilbúnar persónur. Allt eykur þetta líkurnar á því að fólk finni sér maka í netheimum
Rannsóknin sýndi líka að þau pör sem kynnast á netinu eru líklegri til þess að vera hamingjusöm til lengdar en þau sem kynnast í persónu fyrst.
Leitað var til 19,131 hjóna. Kom í ljós að skilnaðartíðni þeirra hjóna sem kynntust á netinu var lægri en þeirra sem kynntust á hefðbundinn máta, eða 6% á móti 7,6%. Hjón voru einnig sáttari í sambandinu ef þau höfðu kynnst á netinu.
John Cacioppo, höfundur rannsóknarinnar, er einnig prófessor í sálfræði við Chicago-háskóla en hann sagði að niðurstöðurnar virtust benda til þess að internetið væri að breyta uppbyggingu sambanda.