Forstjóri Levi Strauss fyrirtækisins sem framleiðir hinar geysivinsælu Levi’s gallabuxur, varpaði sprengju í viðtalsþætti hjá Fortune tímaritinu.
Chip Bergh, sem mætti að sjálfsögðu klæddur gallafötum frá toppi til táar í spjallþáttinn, segir að það eigi EKKI að þvo gallabuxur.
Bergh útskýrði að þetta væri ekki svo skelfileg hugmynd og lýsti því hvernig hann sjálfur notar tannbursta til að hreinsa bletti af buxunum sínum.
Það sem Bergh gengur til með málflutningnum er að vekja athygli á því að neytendur þurfi að hugsa áður en þeir henda hverju sem er í þvottavélina.
„Góðar gallabuxur þurfa ekki að fara í þvottavélina, nema kannski örsjaldan.“
Rökin fyrir þessu eru að þvottur í vél skemmir gallaefnið, og er að auki sóun á vatni.
Þetta er ekki í fyrsta skipti sem þessu er haldið fram. Á vefsíðu gallabuxnaframleiðandans Hiut Denim kemur fram að best sé að bíða í að minnsta kosti sex mánuði áður en gallabuxur eru þvegnar í fyrsta sinn.
Því lengur sem beðið er með þvottinn þeim mun betur munu buxurnar eldast.
„Indigo liturinn í gallaefninu verður máður þar sem efnið krumpast og gefur fallegt útlit. Ef þú þværð buxurnar of snemma þvæst indigo liturinn í burtu jafnt yfir buxurnar, og þar með missa þær töfrana.“
Í stað þess að setja gallabuxur í þvottavél mæla nokkrir framleiðendur með því að setja þær í frysti yfir nótt til að eyða bakteríum. Einnig er hægt að leggja þær út í sólina, eða nota á þær úða sem eyðir lykt.