„Það var eins og einhvers konar opinberun, allt í einu var eins og það hefði verið dregið frá og ég sá svo skýrt hvað það er mikil skömm, ótti og sektarkennd í kringum það að vera kynvera,“ segir Helga í þættinum og segir að hún hafi velt því fyrir sér hvort það væri í lagi að vera kynvera. „Ég þarf að skoða þetta betur og ég byrjaði bara að gúggla.“
Eftir að hafa skoðað þetta á netinu fór Helga að lesa um ýmis fræði í sambandi við kynhnegðun. Eitt þessara fræða var Tantra en þar er kynhegðunin skoðuð auk þess sem æfingar í Tantra geta talist óvenjulegar. Helga talaði við eiginmann sinn um áhuga sinn á þessu en hún var ekki viss hvernig hann tæki í það. „Hvað gerir maðurinn, þessi flotti maður sem ég á? Hann sagði: Ég styð þig, farðu og lærðu um þig.“
Helga segir frá því í þættinum að í þessu ferðalagi hafi hún kynnst sjálfri sér betur en henni fannst mikilvægt að vera hreinskilin við manninn sinn um það sem var í gangi. „Þetta er það sem gerðist. Ég þurfti að misstíga mig og segja ekki alveg allt,“ segir Helga en henni fannst á tímabili eins og hún ætti að skammast sín fyrir langanirnar sínar. „Ég var svo hrædd um að ég væri ekki lengur samþykkt, ég væri ekki lengur elskuð, ég væri ekki allt sem ég hélt að ég þyrfti að fá frá honum.“
Helga talar um það hvað henni finnist það ósanngjarnt að ætlast til þess að ein manneskja geti uppfyllt allar hennar þrár og langanir og veltir því fyrir sér hvort það sé einfaldlega hægt. „Það þýðir bara að hann er ekki búinn til, til að uppfylla allar mínar þrár og langanir, það er engin ein manneskja sem á að geta gert það fyrir neina eina aðra mannesku að mínu mati.“ Hún segir að kannski sé eitthvað fólk mjög heppið að geta bara verið tvö saman. „En að allir hafi val og að það séu ekki einhverjar fyrirfram ákveðnar hugmyndir um það hvernig við lifum lífi okkar og uppfyllum okkar langanir og þrár, það er einhver baggi sem er svo mikilvægt að við séum laus við.“
Hægt er að horfa á þáttinn í heild sinni á vef Hringbrautar
