Þótt jólakort séu á útleið í bréfformi þá eru enn fjölmargir sem búa til jólakort með mynd af fjölskyldunni. Með tilkomu samfélagsmiðla er nefnilega ekkert því til fyrirstöðu að láta jólakveðjuna lifa að eilífu á stafrænu formi. Fræga og fallega fólkið hefur verið duglegt að senda jólakort í aðdraganda hátíðanna – hér eru nokkur góð.
Leikkonan Jennifer Garner fékk lítið prentfyrirtæki í heimabæ sínum, Charleston í Vestur-Virginíu, til að sjá um jólagjafasmíðina í ár. Huggulegt og retró kort.
Ofurhjónin Kim Kardashian og Kanye West láta sitt ekki eftir liggja þegar kemur að jólakortum. Þau stilltu sér upp með börnum sínum, North, Saint, Chicago og Psalm – börnin öll í gráum jogginggöllum í stíl við móðurina, faðirinn með Jesúskomplexa í hvítu. Nema hvað að North litla var fótósjoppuð inn á kortið.
Söngkonan LeAnn Rimes og eiginmaður hennar, leikarinn Eddie Cibrian, lét smella af sér mynd með sonum Eddie; Mason og Jake, sem og fjölskylduhvolpinum Fleetwood.
Það er eiginlega magnað að leikkonan Tori Spelling og eiginmaður hennar, Dean McDermott, hafi náð að smala barnaskaranum saman á mynd og verið öll í sömu litapallettu. Á myndinni ásamt hjónunum eru þau Stella, Hattie, Liam, Finn og Beau.
Fyrirsætan Denise Richards og eiginmaður hennar til eins árs, Aaron Phypers, halda kortinu stílhreinu. Á myndinni eru þau og dætur Denise, þær Sam, Lola og Eloise, og öll klædd í hvítan topp og gallabuxur.
Kyle Richards, stjarnan í Real Housewives of Beverly Hills, klæddi sig upp í grænt með eiginmanni sínum, Mauricio Umansky, og dætrunum Farrah, Alexia, Sophia og Portia.
Jason Biggs er hvað þekktastur fyrir að kitla hláturtaugarnar í American Pie-myndunum. Kort hans og eiginkonu hans til rúms áratugar, Jenny Mollen, er ansi spaugilegt. Börnin Sid og Lazlo eru í aukahlutverki sem og hundurinn Gina.
Hönnuðurinn Rachel Zoe og eiginmaður hennar, Rodger Berman, létu smella af sér mynd á góðgerðarsamkomu fyrr í mánuðinum. Synir þeirra, Skyler og Kaius, fengu að sitja í kjöltu jólasveinsins á meðan móðurinni stökk ekki bros.
