Áhrifavaldurinn Kylie Jenner og tónlistarmaðurinn Drake eru byrjuð að stinga saman nefjum samkvæmt heimildum Us Weekly.
„Vinátta Kylie og Drake hefur tekið rómantíska stefnu,“ segir heimildarmaður blaðsins. „Þau létu vel af hvort öðru í Hrekkjavökuteitinu hans og voru greinilega þar saman. Þau hafa verið að stinga saman nefjum. Hann kom einnig í afmæli Kendall [Jenner],“ bætir heimildarmaðurinn við, en Kendall er systir Kylie.
Us Weekly hefur áður sagt af því fréttir að hugsanlega væru Kylie og Drake byrjuð saman eftir að þau döðruðu mikið í afmæli hans í Los Angeles í október. Hvorki Drake né Kylie hefur staðfest að þau séu par.
Kylie hætti með kærasta sínum til tveggja ára, Travis Scott, í byrjun október. Þau eiga saman dótturina Stormi sem er 21 mánaða gömul. Kylie tísti rétt eftir sambandsslitin og sagði þau Travis skilja í mestu vinsemd.
Drake hefur deitað konur á borð við Rihönnu og Jennifer Lopez og á tveggja ára gamlan son, Adonis, með Sophie Brussaux, fyrrverandi klámstjörnu.