Stúlka sem kærði stjúpföður sinn fyrir kynferðislega misnotkun þegar hún var 12 ára var neydd til að búa áfram á heimili níðingsins eftir að málið kom upp. Rannsókn lögreglu leiddi ekki til ákæru en í barnaverndarkerfinu var viðurkennt að stúlkan hefði orðið fyrir kynferðislegri misnotkun. Þetta kemur fram í fréttum Stöðvar 2.

Stúlkan er fullorðin kona í dag og ræddi um mál sitt í fréttum Stöðvar 2 í kvöld. Hún lýsir sér sem barni sem kerfið hafi gjörsamlega brugðist. Áður en hún kærði ofbeldið 12 ára hafði verið almenn vitneskja um málið í meira en ár. Hún hafði sagt móður sinni, greint frá þessu í skólanum og félagsmiðstöðvum – þetta var orðið vitneskja í fjölskyldunni og félagslega kerfið var komið í málið.

„En einhvern veginn gerði enginn neitt,“ segir konan í viðtali við Stöð 2.

Þegar konan kærði hún málið flýði hún heimili sitt og fór í Kvennaathvarfið. Kvennaathvarfið hafði samband við barnaverndarnefnd sem tók við málinu og þaðan fór það til lögreglu.

„Það fór í gegnum ferli hjá lögreglunni og var síðan fellt niður vegna ónógra sönnunargagna,“ segir konan. Segir hún að flest mál endi þannig.

En hvers vegna var hún neydd til að umgangast áfram stjúpföður sinn?

Barnaverndarnefnd fór fram á að maðurinn myndi yfirgefa heimilið en því var neitað. „Þau vildu ekki að hann yfigæfi heimilið og þar með var ég bara látin búa þarna áfram.“

Ofbeldið og það það hvernig tekið var á því hefur markað djúp spor í ævi konunnar:

„Þetta hefur verið rauði þráðurinn í gegnum líf mitt. Ég hef aldrei getað fótað mig á vinnumarkaði. Ég hef engin mörk, það er búið að valta svo oft yfir mörkin mín. Ég efast svo mikið um sjálfa mig, ég er með fjöláfallastreitu, ég er með vefjagigt og fæ ofsalega lítinn stuðning hjá öllu kerfinu á Íslandi til að vinna úr þessu.“

Fljótlega eftir að mál hennar var fellt niður leiddist hún út í fíkniefnaneyslu: „Ég fann að enginn ætlaði að grípa mig svo ég fór í neyslu og spilaði mig þannig út af heimilinu.“

Konan segir að mikilvægt sé að samfélagið taki samtalið um hvernig bregðast eigi við þegar svona ofbeldi komi upp í fjölskyldum. Það þurfi að vera til staðar neyðarteymi sem sinni allri fjölskyldunni.