Svefn barna getur verið hið mesta vesen og eru foreldrar sífellt að prófa ný ráð í leit að lausn. Ein móðir hélt hún væri með alveg skothelt plan til að hjálpa barninu sínu að sofna, en það mistókst alveg svona stórkostlega.

Ilarni Clark var vön að leyfa syni sínum, Harry sem er 14 mánaða, að fikta í hári sínu á meðan hann sofnaði. En því eldri sem hann varð, því harðhentari varð hann og fékk hún hausverk í kjölfarið.

Hún leitaði ráða á samfélagsmiðlum og hafði hárgreiðslunemi samband við hana. Hún sagðist eiga auka dúkkuhaus sem væri með svipað hár og Ilarni.

Hljómar eins og fullkomin hugmynd? Já og þetta virkaði heldur betur svona vel. Drengurinn sofnaði við að fikta í hári dúkkuhaussins. En hann varð fljótt háður honum og fer núna hvergi án hans. Hann sefur ekki, borðar ekki né fer út úr húsi án þess að dúkkuhausinn sé með í för.

„Hann varð mjög fljótt hrifinn af dúkkuhausnum. Gjörsamlega elskar hann. En svo urðu hlutirnir skrýtnir,“ segir Ilarni við LadBible.

„Upp í rúmi er það ég, maðurinn minn, sonur okkar og dúkkuhausinn. Ég hef oft vaknað á næturnar og brugðið alveg svakalega,“ segir hún.

„Fyrstu næturnar sem dúkkuhausinn var upp í hjá okkur vaknaði ég öskrandi: „Það er einhver upp í rúmi!“ Við gerðum það bæði, ég og maðurinn minn.“

Harry litli fer nú með dúkkuhausinn með sér út um allt og það virðist ekki fara að hætta neitt á næstunni.

Nú eru góð ráð dýr.