Thelmu Berglindi Guðnadóttur finnst að engin kona ætti að raka af sér líkamshárin. Kjósi þær hins vegar að gera slíkt þá ættu þær að virkilega velta því fyrir sér hvort þær raki líkamshár fyrir sig sjálfar, eða til að mæta úreltum hugmyndum einhverra annarra. Þetta kemur fram í pistli hennar hjá Stundinni.
„Í dag virðist fólk, bæði konur og karlar, hafa miklar skoðanir á líkamshárum og þá aðallega á konum. Líkamshár eru oft og tíðum tengd við kyn og eru tengd við karlmennsku eða ókvenleika.“
Thelma bendir á að enginn kippi sér upp við sýnilega líkamshár karlmanna en öfugt á við um konur. Í tilviki kvenna séu gjarnan rekin upp stór augu séu líkamshár þeirra sýnileg, órökuð. „Venjuleg kona eyðir að meðaltali 72 dögum af lífi sínu í að raka á sér fótleggina. Hversu mikilvægt er að raka sig fyrst við erum tilbúin að eyða 72 dögum af lífi okkar í það?“
Thelma segir að vitundarvakning þurfi að eiga sér stað þegar við kemur líkamshárum kvenna. Margar konur séu að fjarlægja af sér öll hár án þess að vita hvers vegna eða fyrir hvern. Eins þurfi að kenna ungum stelpum að hár sé ekki neitt til að skammast sín fyrir.
„Þegar stelpur fá hár á líkamann þá líður þeim ekki eins og þær séu að verða konur, sem er samt raunin. Tilfinningarnar sem koma upp eru óþægindi og skömm, og eins og þær séu öðruvísi. Því alls staðar er talað neikvætt um líkamshár á konum“
Thelmu finnst einkennilegt að eyða þetta löngum tíma í að berjast gegn eigin líffræði.
Að fjarlægja hár getur verið tímafrekt og er það ein ástæða til að hugsa sig um hvort maður vilji gera það. Svo eru aðrar ástæður sem ég hef heyrt frá fólki; útbrot, inngróin hár, óþægindi, núningur, vörtur, sveppasýkingar, auk þess sem fólk er misliðugt og sumir eiga erfitt með að ná á ákveðna staði.
Thelma segist vera þeirrar trúar að engin eigi að raka af sér líkamshár.
„Mín skoðun er ekki sú að engin eigi að raka sig. Enn fremur finnst mér að þær sem kjósa að raka sig ættu að spyrja sjálfa sig „af hverju er ég að raka mig?“ Er það fyrir þig sjálfa, samfélagið, maka, hitt kynið, fólkið í sundi eða veistu það einfaldlega ekki?“
Líkamshár ættu að vera höfð eins og eigenda þeirra sýnist. „Við ættum að spyrja okkur hvort við gerum hlutina fyrir okkur sjálf og aðeins fyrir okkur sjálf, og það ætti að gilda um allt sem við gerum.“