Klæðskerinn Angela Kelly gaf nýverið út bókina The Other Side of the Coin: The Queen, The Dresser and the Wardrobe en Angela hefur unnið í þjónustu Elísabetar Bretadrottningar síðan árið 1994. Bókin var skrifuð með leyfi drottningar.
Meðal þess sem Angela ljóstrar upp í bókinni er hvernig skartgripir og kórónur drottningarinnar eru pússaðar.
„Smá gin og vatn er handhægt til að gefa demöntunum auka gljáa – bara ekki segja skartgripahönnuðinum!“ skrifar Angela meðal annars. Hún bætir við að einnig sé gott að nota uppþvottalög og vatn til að fjarlægja bletti eftir hársprey á skarti.
Angela, sem ber ábyrgð á að hugsa um fatnað og skartgripi drottningarinnar dagsdaglega, segir samt sem áður að allt sem glóir í höllinni fari reglulega í allsherjar hreinsun. Ginið og uppþvottalögurinn séu einungis skyndilausnir.
Klæðskerinn ljóstrar því einnig upp í bókinni að hún hafi notað tepoka til að lita konunglegu skírnarkjólana.