Hlutabréfaviðskipti Eyþórs Arnalds, borgarfulltrúa Sjálfstæðisflokksins, í Morgunblaðinu hafa verið mikið á milli tannanna á fólki undanfarna daga og hafa einhverjir kallað viðskiptin „sýndarviðskipti“ og talið þau vafasöm. DV ákvað því að lesa í tarotspil borgarfulltrúans, en lesendum er bent á að þeir geta sjálfir dregið sér tarotspil á vef DV.
Fyrsta spilið sem kemur upp hjá Eyþóri er Stríðsvagninn. Það táknar metnaðinn og drifkraftinn sem býr innra með Eyþóri og hann virðist geta náð öllum sínum markmiðum, ekki síst af því að hann veit hvar tækifærin liggja. Hann er líka óhræddur við að fara ótroðnar slóðir í lífinu. Hann er hins vegar ekki að nýta hæfileika sína rétt og þarf að leysa úr þeim vanda. Hann þarf að passa það í framtíðinni að vera varkár þegar hann sleppir tækifærum úr greipum sínum. Hann má ekki sýna of mikið fljótræði og verður að spá og spekúlera vel í hlutunum. Mannlegi þátturinn á það til að standa í veginum fyrir Eyþóri og er honum ráðlagt að gefa eftir ef vandamál koma upp milli hans og þeirra sem hann umgengst í starfi sem og persónulega. Eyþór er fær um að takast á við framtíðina ef hann agar sjálfið með jákvæðu hugarfari og jafnvægi.
Næst er það Keisarinn. Merkilegt spil sem sýnir að reynsla Eyþórs, bæði í pólitík og viðskiptum, mun koma sér vel. Framundan hjá honum er stöðuhækkun í núverandi starfi en líklegra er að hann breyti um starfsvettvang og takist á við nýjar, krefjandi áskoranir. Eyþór stendur nú frammi fyrir tækifæri sem sjaldan birtist og ætti hann að kanna möguleika framtíðarinnar gaumgæfilega. Ásetningur Eyþórs og ekki síður skipulag og hagkvæmni mun leiða hann næstu misseri að settu marki. Hann skal einnig hafa í huga að velferð náungans kemur honum lengra en hann grunar.
Loks er það spilið Breytingar. Einn kafli er að enda hjá Eyþóri og nýr um það bil að hefjast. Hann skal hafa það hugfast að fagna þegar kaflanum lýkur, sama hve erfiður hann var. Hér eru nefnilega á ferð breytingar til batnaðar sem Eyþór mun verða var við fyrr en síðar. Þessar breytingar gætu verið brúðkaup, flutningar eða fyrrnefnt nýtt starf. Eyþór og fyrrverandi eiginkona hans fóru nýverið hvort í sína áttina, en hugsanlega hefur ný kona fangað hjarta borgarfulltrúans. Eyþór þarf að hafa hugfast að þessar breytingar gætu orðið erfiðar, eins og breytingar eru oft, og aðlögunarhæfni hans kemur sér því vel í þessu tilviki. Þó að breytingarnar taki á tekur Eyþór þeim fagnandi. Ekki verður aftur snúið þar sem hann gefur fortíðina upp á bátinn og tekur opnum örmum utan framtíðinni og tækifærunum sem bíða hans.