Sólborg Guðbrandsdóttir, tónlistarkona og fyrirlesari, skrifar valdeflandi skilaboð til stúlkunnar sem varð fyrir ofbeldi um helgina á Instagram-síðu sinni Fávitar. Sólborg stofnaði síðuna sem átak gegn stafrænu og annars konar kynferðisofbeldi. Síðan hefur í dag yfir 20 þúsund fylgjendur.
Líkt og DV greindi frá fyrr í dag þá karlmaður um tvítugt grunaður um að hafa beitt unga konu hrottalegu ofbeldi. Stúlkan er ung og ólögráða. Tilkynning um málið barst lögreglu aðfaranótt laugardags og var maðurinn handtekinn á vettvangi miðsvæðis í borginni.
Sólborg ávarpar hana og segir henni að hún sé ekki ein. „Þú átt skilið alla ást í heiminum. Þú átt skilið virðingu. Það er ekkert sem réttlætir ofbeldi og það var aldrei þér að kenna. Ég vil að þú vitir að þú ert ekki ein. Það er heill her af fólki með þér í liði,“ skrifar Sólborg.
Hún minnir enn fremur á að ofbeldi sé einungis gerandanum að kenna. „Þú varðst fyrir ofbeldi og það segir ekkert til um þig nema það að þú ert fokking sigurvegari að standa eftir með bakið breitt, tilbúin að berjast.“
https://www.instagram.com/p/B33CyDgAwrS/
