„Þetta byrjaði á unglingsárunum með því að við félagarnir vorum að horfa á klám saman. Það þróaðist svo í það að rúnka hvorum öðrum og svo fór þetta út í tott,“ segir Halldór, 50 ára karlmaður, í samtali við Makamál á Vísi.
Maðurinn er kallaður Halldór en það er ekki hans raunverulega nafn. Hann vildi ekki koma fram undir nafni þar sem það er mikið tabú í samfélaginu að karlmenn leiki sér saman að hans sögn.
Halldór skilgreinir sig að mestu gagnkynhneigðan. „Stundum langar mig bara að leika við lim og er löngu búinn að átta mig á því að ég „smitast ekki af hommusi“ þó að ég komi við lim,“ segir hann við Makamál.
Hann segir að þetta hafi allt saman byrjað á unglingsárunum þegar hann og félagarnir horfðu á klám saman, það hafi síðan þróast í að þeir rúnkuðu hvor öðrum og seinna meir tottuðu hvor annan.
„Þetta gerðist nokkrum sinnum en mér fannst þetta vera rangt, líklega vegna þess að þetta æsti mig frekar mikið upp. Eftir tvítugt þá hugsaði ég um þetta og það gerði mig frekar mikið graðan en einnig hræddan, hræddan við það að ég væri kannski hommi.“
Hann segir að í dag þegar hann hittir þessa félaga þá ræða þeir þetta ekki.
Flestir karlmennirnir sem Halldór sefur hjá eða „leikur sér“ við í dag skilgreina sig sem gagnkynhneigða í 95 prósent tilvika að sögn Halldórs. „Og eru oftast giftir,“ segir hann.
Töff að konur leiki sér saman
Halldór segir að það þykir mikið tabú að karlar leiki sér saman. „Eða svona jafn mikið tabú og það þykir töff að konur leiki sér saman,“ segir hann.
„Það eru rifnir upp íslenskir fánar og þjóðsöngurinn sunginn ef konur byrja að láta vel hvor að annarri. Ef þær kyssast og káfa þá er eins og það hafi verið skorað mark. En það að karlmenn leiki saman er bara mega tabú og enginn má vita neitt. Líklega þykir það bara alls ekki karlmannlegt að karlmenn stundi kynlíf saman eða allavega ekki eins töff og þegar konur gera það,“ segir Halldór.