„Það varð talsverð aukning á árunum 2013 til 2018 en það sem af er þessu ári hefur algjör sprenging orðið,“ segir breski umboðsmaðurinn Rob Cooper sem hefur haft fjölmargar raunveruleikastjörnur á sínum snærum.
Rob segir að það færist í vöxt að ríkir karlar bjóði konum sem komið hafa fram í raunveruleikaþáttum fúlgur fjár fyrir einnar nætur gaman. Þetta eigi til dæmis við um þátttakendur í raunveruleikaþáttunum vinsælu Love Island. Þegar atvinnutækifærum fer fækkandi þegar líður frá sýningum þáttanna komi tilboðin á færibandi
Dæmi séu um að konum standi til boða að fá sem nemur nokkrum milljónum króna fyrir eina kvöldstund.
Í frétt The Sun, sem fjallar um málið, er til dæmis sagt frá Lauren Goodger sem kom fram í þáttunum The Only Way Is Essex. Hún viðurkenndi ekki alls fyrir löngu að hún hefði fengið býsna góð tilboð, ef svo má segja. Önnur raunveruleikastjarna, Sophie Anderton, viðurkenndi að hún hefði þénað 50 þúsund pund á fimm kvöldstundum. Þá var greint frá því fyrir skemmstu að fyrirsætan og raunveruleikastjarnan Katie Price hefði fengið tólf þúsund pund fyrir kvöldstund með knattspyrnumanninum Adam Johnson – sem síðar var dæmdur í fangelsi fyrir kynferðisbrot gegn stúlku undir lögaldri.
Rob segir að mörg dæmi séu um að raunveruleikastjörnur þiggi þessi boð. Margir þessara einstaklinga séu ekki endilega vel staddir fjárhagslega og til að viðhalda lífsstíl sínum sé þetta tiltölulega einföld og fljótleg leið til að ná inn tekjum. „Ég veit um að minnsta kosti tíu stjörnur sem hafa sagt umboðsmönnum sínum að taka svona tilboð til skoðunar.“
Segir Rob að inni í þessum tilboðum séu oft ferðalög á framandi slóðir þar sem lúxusinn er í fyrirrúmi. Gist sé á snekkjum eða glæsilegum hótelum og því séu tilboð sem þessi oft freistandi.