Móður fimm ára stúlku var illa brugðið þegar hún fékk sent bréf þess efnis að fimm ára dóttir hennar væri allt of þung. Raunar væri hún nálægt því að glíma við offitu. Þetta kom móðurinni verulega á óvart enda er stúlkan aðeins 23 kíló og fullkomlega heilbrigð.
Karis Campbell er búsett í Harlow í Essex á Englandi og var hún nýkomin heim úr sumarfríi með fjölskyldunni þegar bréf beið hennar á heimilinu. Bréfið var frá bæjaryfirvöldum og þar var meðal annars greint frá niðurstöðum hæðar- og þyngdarmælingar sem dóttir hennar, Lexi, fór í ásamt skólasystkinum sínum í vor.
Þar kom fram að Lexi væri í ofþyngd, samkvæmt fyrir fram gefnum þyngdarstuðli, og raunar nálægt því að glíma við offitu samkvæmt sama stuðli. Þess er getið í frétt Mirror að hin fimm ára gamla Lexi sé 112 sentímetrar á hæð og 23 kíló.
Karis trúði þessu varla en fór síðan sjálf á heimasíðu sem gefin var upp í bréfinu og færði tölurnar sjálf inn. „Þar kom fram að hún væri fimm prósentustigum frá því að glíma við offitu.“
Karis er mjög ósátt við þau skilaboð sem verið er að senda dóttur hennar og öðrum börnum. Bendir hún á að dóttir hennar stundi ballet, leiki sér mikið og sé full af orku. „Hún er fimm ára. Hvernig er hægt að senda börnum svona skilaboð,“ segir hún og bætir við að henni detti ekki í hug að segja dóttur sinni frá niðurstöðunum.
Talsmaður yfirvalda í Essex segir við Mirror að farið sé eftir verklagsreglum breskra heilbrigðisyfirvalda og markmiðið sé að fylgjast með þróun ofþyngdar og offitu meðal barna.
