Söngkonan Britney Spears má hvorki gifta sig né eignast börn nema faðir hennar, Jamie Spears, gefi leyfi. Ástæðan fyrir þessu er að Jamie hefur verið fjárhaldsmaður dóttur sinnar síðan árið 2008 og stjórnar því nákvæmlega hvernig hún hagar lífi sínu, allt frá því hve mikinn pening hún fær á hverjum mánuði til hvar hún megi búa og með hverjum.
Jamie er 66 ára og jafnar sig nú eftir að ristill hans sprakk og hann eyddi tæplega mánuði á sjúkrahúsi. Nú er hann heima við og jafnar sig eftir átökin.
Britney hefur verið í sambandi með fyrirsætunni og leikaranum Sam Asghari um árabil en þarf að bera allar breytingar í sambandinu undir föður sinn samkvæmt frétt Us Weekly.
„Britney getur ekki gift sig nema Jamie samþykki,“ segir heimildarmaður blaðsins og heldur áfram: „og Jamie er ekki líklegur til að veita samþykki þar sem það myndi eingöngu skapa flókin lögfræðivandamál.“
Britney á tvo syni; Preston, þrettán ára og Jayden, tólf ára, með fyrrverandi eiginmanni sínum Kevin Federline. Samkvæmt Us Weekly langar Britney í annað barn en „þarf að fá samþykki pabba fyrir því líka.“