Reynir Bergmann er einn vinsælasti snapparinn í dag með yfir þrettán þúsund fylgjendur sem horfa á hann daglega. Svartur húmor Reynis og einlægni hans spurðist hratt út og fara áhorf hans sífellt hækkandi.
„Ég fékk ógeð á þessum sýndarmennsku snöppurum sem láta allt líta svo pörfekt út, en það er ekki þannig hjá neinum manni. Það er enginn með allt upp á við í lífinu og það var þess vegna sem sem ég byrjaði að snappa. Ég vildi sýna hvernig raunverulegt líf sé og skef ég ekkert undan. Ég segi hlutina nákvæmlega eins og þeir eru, einlæglega og heiðarlega hvort sem fólki líkar það betur eða verr,“ segir Reynir í viðtali við Bleikt.
Þrátt fyrir að grín og glens sé oft í aðalhlutverki inni á snappinu hjá Reyni hefur hann einnig talað mjög opinskátt um alkóhólisma og meðvirkni sem hann hefur sjálfur þurft að ganga í gegnum. Reynir er búsettur á Selfossi með Sólveigu Ýr konu sinni og saman eiga þau eina sjö ára dóttur ásamt annari tólf ára sem Reynir á úr fyrra sambandi.
Sólveig er nú ólétt að þeirra þriðja barni og er settur dagur á morgun 6. júlí. Reynir og Sólveig tóku þá ákvörðun á dögunum að leyfa fylgjendum hans að fylgjast með fæðingunni í beinni útsendingu í gegnum Snapchat.
„Ástæða þess að við ákváðum að snappa fæðinguna er sú að ég hef alltaf haft heimili mitt opið fyrir öllum mínum fylgjendum og fólk elskar að fylgjast með lífi okkar. Þá varð þessi hugmynd til og ég veit að þúsundir manna eru að deyja úr spenning og hlakka til þess að sjá fjölskyldu okkar stækka. Ég fæ hundruð skilaboða á dag frá spenntum fylgjendum.“
Reynir segir að vegna þess að þau hafi ákveðið að eiga barnið á Selfossi þurfi þau ekki að hafa miklar áhyggjur af uppsögnum og kjarabaráttu ljósmæðra nema ef eitthvað kæmi upp á í ferlinu og þau þyrftu að fara til Reykjavíkur.
„Ef það gerist þá höfum við töluverðar áhyggjur. Nýlega hef ég verið að upplýsa fólk um það þegar Sólveig fær samdrætti eða óeðlilega verki og fólki líður eins og það sé að horfa á spennumynd,“ segir Reynir og hlær.
„Sólveig er ótrúlega sterk en ég finn að hún er tilbúin að koma barninu í heiminn. Hún hefur staðið sig eins og hetja þessa mánuði en hún er að þreytast. Hún er auðvitað aðeins kvíðin fyrir fæðingunni sem er mjög skiljanlegt en konur eru hetjur að ganga með þessi börn fyrir okkur, hvað þá að fæða þau.“
Reynir ætlar að halda áfram að sýna frá lokametrum meðgöngunnar ásamt því að snappa frá fæðingunni sjálfri.
„Við munum sýna frá því þegar við erum komin upp á spítala og þegar hún er komin í hríðir. Við munum líka sýna fæðingarferlið og þegar barnið kemur í heiminn. Auðvitað sýnum við ekki klofið á konunni minni fyrir framan þúsundir manna, ég ber nú meiri virðingu fyrir henni en það en við munum samt sýna mikið.“
Fyrir þá sem hafa áhuga á því að fylgjast með fæðingu barns þeirra Reynis og Sólveigar geta bætt honum við á Snapchat : reynir1980