Ragga Nagli er klínískur heilsusálfræðingur og einkaþjálfari. Í nýjasta pistli sínum á Facebook er hún með holla lesningu fyrir heilbrigðan lífsstíl:

Borða á tveggja tíma fresti, á sautján tíma fresti, á fimmtán tíma fresti.
Borða innan níu klukkutíma ramma. Eða áður en sjö tímar eru liðnir.
Mænandi á klukkuna allan daginn.

Borða einu sinni á dag, þrisvar á dag, sex sinnum á dag.
Telja máltíðirnar með appi.

Borða kolvetni annan hvern dag.
Eða forðast kolvetni alfarið…. eins og pláguna.

Sleppa hveiti og sykri.
Slafra í staðinn bernes, beikon, smjör og rjóma.

Engar mjólkurvörur. Ekkert glútein. Ekkert salt.

Brauð með osti og mjólk sem hélt lífinu í velmegunarbörnum níunda áratugarins víkja fyrir möndlumjólk og fræjuðu hrökkkexi.

Ekkert kjöt. Taka veganúar alla leið. Bara baunir. Avókadó og spínat.
Éta bara epli sem vildi sjálft detta af trénu.

Æfa á fastandi maga. Æfa fimm sinnum í viku. Krossfitt er best. Þungar lyftingar kannski betri. Eða Bootcamp? Nei, langhlaup… eða hjólreiðar

Í byrjun árs vill hver einasti gúrú og samsteypa dúndra í þig stjarneðlisfræðilegu snæðingaplani, magískum matvælum, epískri kombinasjón af vítamínum eða stórkostlegri aðferð við járnrífingar.

Það eina sem þetta upplýsingaflæði gerir er að flækja lífið enn frekar.

Suma daga kemstu ekki á æfingu
Suma daga borðarðu margar hitaeiningar
Aðra daga borðarðu fáar hitaeiningar
Stundum gleymirðu að taka vítamínin þín
Suma daga líður langt frá æfingu til máltíðar
Suma daga gúllarðu of lítið af prótíni
Suma daga passa bara tvær stórar máltíðir
Aðra daga ertu með fleiri og smærri snæðinga

Vöðvarnir rýrna ekki í öreindir þó þú náir ekki að borða strax eftir æfingu.
Líkamsstarfssemin hrynur ekki þó vítamínin gleymist.
Þú fitnar ekki eins og holdanaut á leið til slátrunar þó hitaeiningarnar fari aðeins yfir.
Það deyja ekki tíu kettlingar þó þú borðir aðeins of lítið.

Ef þig langar þig að missa 20 kg er leyndarmálið að árangri ekki í öreinda analýseruðum smáatriðum.

Borðaðu heila fæðu. Fæðu sem er ekki með innihaldslýsingu.
Eitthvað sem kom beint af tré, uppúr mold, af dauðri skepnu eða af akri.

Minnkaðu skammtana.
Einni kartöflu minna, skerðu 1/4 af kjötmetinu, einni matskeið minna af sósu.

Hreyfðu þig meira.
Ertu í núll og nix flokknum?
Byrjaðu að fara einu sinni í viku fyrsta mánuðinn. Bara í 20 mínútur.
Ertu þegar að fara þrisvar í viku? Dúndraðu inn tveimur æfingum í viðbót.
Eða bættu í ákefðina. Hlauptu 1 km lengra. Eða hraðar. Lyftu aðeins þyngra næst í réttstöðulyftu.

Þetta eru ekki geimvísindi.

Á öld Google, Pinterest, bloggs, snapptjatt og Instagram eru fleiri upplýsingar það síðasta sem við þurfum.
Ef við erum alltaf með fókusinn á hvert nanóatriði sem miðlarnir skella í andlitið á okkur kæmum við litlu í verk.

Fleiri upplýsingar veldur athyglisbresti og smáatriðalömun.
Smáatriðalömun vekur katastrófuhugsanir, vonleysi og sjálfsniðurrif. Slíkt neikvætt tilfinningaástand stóreykur líkurnar á uppgjöf.
Athyglisbrestur lætur okkur hoppa úr einu prógrammi í annað án þess að gefa því tíma til að virka.

Ef þú eltir tvær kanínur í skógi þá nærðu hvorugri.

Árangurinn liggur í að halda sig við efnið.
Dag eftir dag eftir dag…. viku eftir viku eftir viku….sama hvað.

Facebooksíða Röggu nagla.