„Þeir sem ég ræddi við segja all­ir sömu sög­una. Þeir eru ótta­slegn­ir og hrædd­ir við að segja að þeir séu gyðing­ar eða frá Ísra­el,“ segir Birgir Þórarinsson, þingmaður Sjálfstæðisflokksins, í samtali við Morgunblaðið í dag.

Í fréttinni kemur fram að Morgunblaðið hafi leitað til Birgis eftir að viðmælendur blaðsins höfðu lýst vanlíðan gyðinga hér á landi. Sjálfur heimsótti hann Ísrael og Palestínu eftir voðaverkin 7. október þegar vígamenn á vegum Hamas réðust á óbreytta borgara í Ísrael.

Birgir segist hafa rætt nýlega við gyðinga sem búsettir eru á Íslandi en gyðingasamfélagið hér telur um 400 manns.

„Ég fékk leyfi til að segja frá því hvernig þeim liði, en ég mátti ekki nafn­greina þá sem ég ræddi við og þeir vildu ekki að mynd yrði birt af okk­ur. Þeir segj­ast finna fyr­ir vax­andi gyðinga­h­atri hér á landi og vilja helst ekki að þeir þekk­ist á götu úti. Þeir passa vel upp á að ísra­elski fán­inn sé hvergi sýni­leg­ur þar sem þeir eru. Það er óhætt að segja að þeir fari með veggj­um,“ segir hann í samtali við Morgunblaðið.

Hann bætir við að tilfinning þeirra sé að rödd Ísraels varðandi stríðið heyrist ekki í fjölmiðlum hér á landi og margar rangar fullyrðingar frá Hamas-samtökunum endurómaðar og birtar sem sannleikur.

„Vegna stríðsins á Gasa hafa börn gyðinga orðið fyr­ir aðkasti hér á landi. Þau hafa orðið fyr­ir einelti á net­inu og í skól­um af ís­lensk­um börn­um og einnig múslímskum skóla­fé­lög­um sem hafa ar­ab­ísku að móður­máli. Þess eru dæmi að börn hafi þurft að skipta um skóla vegna þessa. Þá var gyðingi neitað um af­greiðslu í versl­un fyr­ir jól­in í Reykja­vík fyr­ir það eitt að vera gyðing­ur,“ segir Birgir við Morgunblaðið þar sem nánar er fjallað um þetta mál.