Það er ekki ofmælt um hversu umræðan um gengislánin er tilfinningaþrungin og erfið, og kannski ekki furða, fjárhagslegir hagsmunir þúsunda manna eru í húfi.

Það er líka vont að hafa þessi mál í óvissu lengi, en á endanum kemur það líklega í hlut dómstóla að úrskurða hvernig endurgreiðslum vegna þessara lána verður háttað. Helst þyrftu slík mál að fá einhvers konar flýtimeðferð.

Það er auðvitað fáránlegt úr þessu hafi ekki verið skorið fyrir löngu – já, áður en þetta gengislánafár hófst. Þetta er enn eitt dæmið um fúsk í íslenska kerfinu. Og ótrúlegt hvað þetta hefur reynst samfélaginu dýrkeypt – gengislánin voru jú eitt af því sem gróf undan íslenska hagkerfinu.

Og auðvitað hefðu stjórnvöld átt að taka þessi skuldamál heimilanna miklu fastari tökum strax eftir hrunið.

Því eitt atriði er alveg á hreinu: Afdrif gengislánanna kalla á að eitthvað verði líka gert varðandi verðtryggðu lánin, allsherjar endurskoðun á þessum málaflokki.