Að ferðast með flugvél þýðir að maður situr í lokuðu rými með fullt af öðru fólki í margar klukkustundir. Yfirleitt er þetta þægilegt og jafnvel spennandi fyrir suma en sérfræðingar benda á að val á sæti geti skipt máli hvað varðar að komast í snertingu við bakteríur um borð í flugvélinni.

Margir sérfræðingar í smitsjúkdómum segja að sætin við ganginn séu þau þar sem mesta hættan sé að komast í snertingu við aðra farþega. Jarod Fox, smitsjúkdómalæknir hjá Orlando Health, segir að þegar setið sé í þessum sætum sé fólk mjög nálægt þeim sem ganga um farþegarýmið. Fólk fer á klósettið, sækir farangur í hólfin fyrir ofan sætin eða gengur bara um til að teygja aðeins úr fótunum.

Ashley Drews, farsóttafræðingur á Houston Methodist sjúkrahúsinu, segir að þegar setið er í þessum sætum komist fólk oft í snertingu við þá sem ganga um vélina. Rannsókn, sem var gerð af vísindamönnum við Emroy háskólann, leiddi í ljós að um 40% flugfarþega standa upp að minnsta kosti einu sinni á meðan á fluginu stendur og tæplega 20% standa upp oftar en einu sinni.

Sérfræðingar leggja áherslu á að mesta hættan tengist ekki aðeins sætinu, heldur aðallega hversu nálægt smituðum einstaklingi maður er. Að sitja við hliðina á smituðum einstaklingi eykur hættuna meira en að sitja í gluggasætinu. Sæti við hliðina á, fyrir framan eða aftan smitaðan einstakling geta verið opnari fyrir smiti  því um beina og langvarandi nærveru er að ræða.