Liverpool er staðráðið í að reyna að semja aftur við Ibrahima Konaté en aðeins ef hægt er að ná samkomulagi innan launastrúktúrs félagsins. Sky segir frá.

Samningur varnarmannsins rennur út næsta sumar og búist er við að hann muni kanna möguleika sína í janúar, þegar hann má ræða við erlend félög. Real Madrid hefur áður sýnt áhuga á að fá Frakkann á frjálsri sölu, en samkvæmt nýjustu fregnum er sá áhugi að kólna.

Liverpool mun aðeins endurnýja samninginn ef kjörin passi fjárhagsreglum félagsins, og á sama tíma er verið að kanna markaðinn fyrir mögulega arftaka. Félagið hefur lengi haft augastað á enska landsliðsmanninum Marc Guehi hjá Crystal Palace, sem er einnig að nálgast síðustu sex mánuði samnings síns.

Bayern München fylgist einnig vel með Guehi en forgangsverkefni Þjóðverja er að tryggja áframhaldandi samning við Dayot Upamecano, sem rennur út árið 2026.