Ef marka má vef Football Insider hefur Chelsea lagt fram 14 milljóna punda tilboð í Cristiano Ronaldo, leikmann Manchester United.

Ronaldo vill komast frá Man Utd og spila fyrir lið sem mun leika í Meistaradeild Evrópu á næstu leiktíð. Enskir miðlar halda því fram í dag að Man Utd sé búið að sætta sig við það að Ronaldo sé að fara.

Ronaldo sneri aftur til Man Utd í fyrra, tólf árum eftir að hann yfirgaf félagið fyrir Real Madrid.

Sjálfur átti Portúgalinn fínasta tímabil en liðið olli hins vegar vonbrigðum og hafnaði í sjötta sæti.

Ronaldo hefur ekki mætt til æfinga eftir sumarfrí og er ólíklegt að hann fari með Man Utd í æfingaferð. Haldið verður utan á föstudag.

Man Utd hefur hingað til haldið því fram að Ronaldo sé ekki til sölu. Nú áttar félagið sig hins vegar á því að leikmaðurinn hefur tekið ákvörðun og honum verði ekki haggað.

Auk Chelsea eru Bayern Munchen og Napoli einnig sögð áhugasöm um Ronaldo. Öll félögin leika í Meistaradeildinni.