Breskur póstburðarmaður hefur verið dæmdur í þriggja ára fangelsi fyrir að reka umfangsmikla ólöglega streymisþjónustu sem seldi aðgang að íþróttaútsendingum, þar á meðal leikjum úr ensku úrvalsdeildinni.

Michael David Barrow, 48 ára gamall frá Milford Haven í Wales, rak IPTV-þjónustuna „MB Streams“ í um fimm ár. Á því tímabili er talið að hann hafi haft yfir 2.000 viðskiptavini og grætt meira en 200 þúsund pund, jafnvirði rúmlega 35 milljóna íslenskra króna.

Samkvæmt saksóknurum urðu sjónvarpsstöðvar á borð við Sky Sports, TNT Sports og BT Sport fyrir tekjutapi sem gæti numið allt að sex milljónum punda vegna starfseminnar.

Dómari við Swansea Crown Court sagði að um umfangsmikil fjársvik hefði verið að ræða og að græðgi hefði verið helsti drifkrafturinn að baki brotunum.

Barrow hvatti viðskiptavini sína til að merkja greiðslur sem kaup á gömlum knattspyrnutreyjum til að fela raunverulegan tilgang þeirra. Þá notaði hann einnig dulkóðaða samskiptaforritið Telegram til að eiga samskipti við viðskiptavini sína.

Þrátt fyrir að lögregla hefði áður varað hann við og krafist þess að hann hætti starfseminni hélt hann henni áfram, sem hafði áhrif á þyngd dómsins.