Turan Tovuz, sem spilar í Aserbaídsjan, hefur verið meinað að taka þátt í Sambandsdeildinni á næstu leiktíð vegna gamals mútumáls.

UEFA byggir ákvörðunina á máli frá árinu 2019 þegar sjö leikmenn félagsins voru settir í lífstíðarbann frá knattspyrnu af aserska knattspyrnusambandinu.

Turan Tovuz harmaði ákvörðun UEFA í yfirlýsingu og sagðist félagið ætla að áfrýja til Alþjóðaíþróttadómstólsins, CAS.

„Við unnum okkur inn sæti í Sambandsdeildinni á íþróttalegum forsendum og munum grípa til allra lagalegra úrræða til að verja rétt okkar,“ segir meðal annars í yfirlýsingu félagsins.

Félagið endaði í þriðja sæti efstu deildarinnar í Aserbaídsjan á síðustu leiktíð og tryggði sér þar með Evrópusæti í fyrsta sinn í rúm 30 ár.