Louis Saha, fyrrverandi leikmaður Manchester United, telur félagið þurfa að styrkja vörnina fyrir næsta tímabil og hefur hvatt það til að reyna að kaupa Micky van de Ven frá Tottenham.

Saha bendir á að United muni spila mun fleiri leiki á næstu leiktíð eftir að hafa farið í Meistaradeildina og þá hafi meiðsli strítt liðinu.

„Við eigum marga góða varnarmenn en þeir eru oft meiddir. Það er hættulegt ef þú ætlar að eiga stöðugt tímabil,“ segir Saha.

Van de Ven hefur verið orðaður við brottför frá Tottenham eftir erfitt tímabil hjá liðinu, þar sem það rétt bjargaði sér frá falli.