FIFA hefur verið sakað um að vinna með endursölusíðum til að losa sig við miða á leiki sem seljast illa á HM vestan hafs í sumar.

Málið snýst meðal annars um leik Sádi-Arabíu og Grænhöfðaeyja í Houston þann 26. júní, þar sem stór samliggjandi svæði af sætum hafa birst á endursölusíðunni SeatGeek á mun lægra verði en hjá FIFA sjálfu.

Florian Ederer, austurrískur hagfræðingur, segir þetta benda sterklega til þess að FIFA sé sjálft að koma óseldum miðum inn á endursölumarkaðinn.

„Þetta lítur ekki út eins og venjuleg endursala frá stuðningsmönnum. Hér eru heilar raðir og stór svæði seld saman,“ skrifaði hann á X.

Ederer telur FIFA vilja forðast að lækka opinbert miðaverð þar sem það gæti kallað á að stuðningsmenn sem þegar hafa keypt miða á hærra verði vilji fá endurgreiðslu.

Sumir stuðningsmenn hafa bent á að sömu sæti kosti um 700 dollara hjá FIFA en aðeins um 200 dollara á SeatGeek.

FIFA hefur sætt mikilli gagnrýni fyrir hátt miðaverð á HM, en dýrustu miðarnir á úrslitaleikinn kosta allt að 32 þúsund dollara eða 4 milljónir íslenskra króna.