Atlético Madrid hefur útilokað sölu á Julián Álvarez þrátt fyrir að Barcelona hafi lagt fram tilboð í argentínska framherjann.

Enrique Cerezo, forseti Atlético, sagði í samtali við fjölmiðla að félagið hefði engan áhuga á að missa einn af sínum mikilvægustu leikmönnum.

„Julián Álvarez er leikmaður Atlético Madrid og ekki bara fyrir þetta tímabil heldur mörg næstu ár,“ sagði Cerezo ákveðinn.

Barcelona hefur verið sterklega orðað við Álvarez síðustu vikur og samkvæmt fréttum lagði félagið fram formlegt tilboð í sumar. Atlético hefur hins vegar hafnað öllum hugmyndum um sölu.

Álvarez hefur verið lykilmaður hjá Madrídarfélaginu frá komu sinni og er talinn einn af hornsteinum framtíðarverkefnis Diego Simeone.

Forsetinn gaf einnig í skyn að félagið væri frekar að skoða leiðir til að styrkja hópinn en að selja stjörnur sínar.

„Við vinnum stöðugt að því að fá bestu leikmennina til félagsins. Það er enn nægur tími til að skoða markaðinn og bæta við hópinn,“ sagði Cerezo.

Barcelona virðist því þurfa að leita annað ef félagið ætlar að styrkja sóknarlínuna í sumar, enda standa forráðamenn Atlético fast á sínu varðandi framtíð hins 26 ára gamla heimsmeistara Argentínu.