Albert Brynjar Ingason, sparkspekingur, segir að Víkingar hafi viljað bjóða Tryggva Hrafni Haraldssyni framherja Vals samning. Þeir hafi hins vegar bakkað frá þegar þeir heyrðu af þeim launatölum sem eru í boði fyrir Tryggva á Akranesi.

Tryggvi Hrafn verður samningslaus hjá Val í haust og hefur uppeldisfélag hans, ÍA reynt að fá hann ítrekað síðustu mánuði.

Félögum er frjálst að ræða við Tryggva núna og reyna að tryggja sér starfskrafta hans eftir tímabilið. Ekki er útilokað að Valur reyni að halda honum.

„Ég frétti af því að Víkingum hefði verið boðið að taka þátt í kapphlaupinu um Tryggva Hrafn, bjóða honum samning,“ sagði Albert Brynjar í hlaðvarpinu Dr. Football í gærkvöldi.

Víkingar voru samkvæmt Alberti spenntir að opna samtalið en svelgdist fljótt á kaffinu.

„Þeir fengu að vita að ÍA væru komnir inn í þetta, það vita allir af því. Víkingar voru til í það og opnuðu samtalið, eftir að þeir heyrðu hvað Skagamenn eru að bjóða honum. Þá sögðu þeir takk en nei takk og telja sig ekki eiga séns í það.“