Chelsea er sagt fylgjast grannt með stöðu Jarrod Bowen eftir að West Ham féll úr ensku úrvalsdeildinni á nýliðnu tímabili.

Samkvæmt fréttum frá The Independent hefur Lundúnafélagið haft augastað á enska landsliðsmanninum um nokkurt skeið og telur hann geta styrkt sóknarlínu liðsins verulega fyrir komandi tímabil.

Bowen, sem er 29 ára gamall, hefur verið einn af bestu og stöðugustu leikmönnum West Ham undanfarin ár. Chelsea er sérstaklega hrifið af leiðtogahæfileikum hans og fjölhæfni, en hann getur leikið bæði á köntunum og í fremstu víglínu.

Fall West Ham gæti gert félaginu erfitt fyrir að halda sínum stærstu stjörnum og Bowen er talinn líklegur til að vekja mikinn áhuga á félagaskiptamarkaðnum í sumar.

Chelsea er þó ekki eitt um hituna. Fjölmörg félög á Englandi og víðar í Evrópu eru sögð fylgjast með stöðu leikmannsins og gætu lagt fram tilboð á næstu vikum.

Bowen hefur verið lykilmaður hjá West Ham frá því hann kom til félagsins frá Hull City árið 2020 og hefur skorað fjölda mikilvægra marka fyrir félagið, þar á meðal í Evrópukeppnum.