Íslenska karlalandsliðið varð eitt af fyrstu landsliðunum til að finna fyrir nýjum og mun harðari reglum sem verða í gildi á HM í sumar þegar Strákarnir okkar töpuðu 1-0 fyrir Japan í vináttulandsleik um helgina. Fjallað er um þetta í erlendum miðlum.

Alþjóðaknattspyrnusambandið hefur staðfest fjölda reglubreytinga sem þegar hafa verið teknar í gildi og verða notaðar á heimsmeistaramótinu vestan hafs. Meðal annars verða reglur varðandi leiktafir hertar verulega.

Framkvæmi lið ekki innkast innan fimm sekúndna færist það yfir til andstæðinganna, en tafir við markspyrnur geta leitt til þess að dæmd verði hornspyrna á liðið sem brýtur regluna. Þá munu leikmenn sem hylja munn sinn í átökum eða rifrildum eiga á hættu að fá rautt spjald.

Ein umdeildasta breytingin snýr þó að skiptingum. Þegar skipting hefur verið tilkynnt fær leikmaður sem er að fara af velli aðeins tíu sekúndur til að yfirgefa völlinn, stystu leið. Takist það ekki má varamaðurinn ekki koma inn á fyrr en leikurinn stöðvast næst, að minnsta kosti mínútu eftir að leikur hefst á ný.

Það var einmitt þessi regla sem kom Íslandi í koll gegn Japan. Þegar tvöföld skipting var framkvæmd á 85. mínútu gekk fyrri skiptingin eðlilega fyrir sig, en Kristian Nökkvi Hlynsson var of lengi að yfirgefa völlinn. Dómarinn neitaði því að hleypa varamanninum Ísaki Snæ Þorvaldssyni inn á og Ísland varð að leika manni færra þar til boltinn fór næst úr leik.

Það tók alls eina mínútu og 51 sekúndu og á þeim tíma skoraði Koki Ogawa sigurmark Japana með skalla á 87. mínútu. Markið kom því á meðan Íslendingar voru aðeins tíu inni á vellinum.

Arnar Gunnlaugsson landsliðsþjálfari gagnrýndi þessar nýju reglur FIFA að leik loknum. Telur hann afar sérstakt að reyna að koma í veg fyrir leiktafir með þeim afleiðingum að annað liðið spili manni færra og þurfi því að spila varnarsinnaðri fótbolta á meðan.

Þetta má sjá hér að neðan.