Íslenskur knattspyrnudrengur er á leið til danska félagsins FC Nordsjælland eftir að félagið tryggði sér undirskrift eins efnilegasta leikmanns KR.

Samkvæmt danska miðlinum Tipsbladet hefur Fannar Heimisson, fæddur árið 2011, ákveðið að ganga til liðs við Nordsjælland í félagaskiptum sem eru sögð met sala fyrir KR á leikmanni á þessum aldri.

Fannar, sem leikur sem framherji, mun skrifa undir þriggja ára samning, sem er hámarkslengd samnings fyrir unglingaleikmann. Samningurinn tekur gildi sumarið 2027 þegar hann verður 16 ára og gildir til ársins 2030.

Mikill áhugi hefur verið á Fannari undanfarin misseri. Hann hefur meðal annars farið á reynslu hjá FC Kaupmannahöfn og samkvæmt heimildum Tipsbladet voru fleiri stór félög víðs vegar um Evrópu á höttunum eftir honum.

Þrátt fyrir það valdi Fannar að flytja til Farum og ganga til liðs við Nordsjælland, sem hefur á undanförnum árum byggt upp orðspor fyrir að þróa unga og efnilega leikmenn.

Danska félagið telur Fannar búa yfir öllum þeim eiginleikum sem þarf til að ná langt í atvinnumennsku. Hann þykir öflugur líkamlega, tæknilega sterkur og hafa góða markaskorunareiginleika.

Fannar verður þar með næsti íslenski leikmaðurinn sem reynir fyrir sér hjá Nordsjælland, en áður hefur Alexander Rafn Pálmason einnig skipt frá KR til danska félagsins.

Fannar gekk í raðir KR fyrir þetta tímabil frá Stjörnunni en hann hefur einu sinni verið í leikmannahóp liðsins í Bestu deild karla í sumar.