Bayern Munich hefur gert það ljóst að Michael Olise sé ekki til sölu í sumar þrátt fyrir mikinn áhuga stærstu félaga Evrópu.
Þýska félagið hefur tekið harða afstöðu og jafnvel hlegið að hugmyndum um að tilboð upp á 175 milljónir punda gæti fengið þau til að selja leikmanninn. Heiðursforseti félagsins, Uli Hoeness, sagði nýlega að félagið væri ekki tilbúið að veikja liðið fyrir fjárhagslegan ávinning.
Forstjórinn Jan-Christian Dreesen tók í sama streng og sagði að Bayern væri ekki einu sinni að velta fyrir sér sölu. Olise er samningsbundinn til ársins 2029 og er án klásúlu, sem gerir stöðu félagsins enn sterkari.
Frammistaða Olise hefur vakið mikla athygli, meðal annars í sigri Bayern á Real Madrid í Meistaradeildinni þar sem hann var einn besti maður vallarins.
Fjölmörg félög hafa verið orðuð við kantmanninn, þar á meðal Liverpool, Manchester City, Arsenal og Manchester United, en áhugi þeirra virðist ekki leiða til raunhæfra viðræðna.
Olise gekk til liðs við Bayern frá Crystal Palace árið 2024 og hefur síðan fest sig í sessi sem lykilmaður liðsins.
