Jamie Carragher telur að Andoni Iraola, stjóri Liverpool, þurfi að eiga erfið samtöl við Dominik Szoboszlai og færa Ungverjann varanlega í hægri bakvarðarstöðuna.
Szoboszlai, 25 ára, skrifaði í sumar undir nýjan samning sem færir honum um 350 þúsund pund á viku eftir að hafa verið valinn leikmaður ársins hjá Liverpool á síðasta tímabili.
Þrátt fyrir sterka frammistöðu á miðjunni hefur hann einnig leikið í hægri bakverði og fór meðal annars þangað í seinni hálfleik í 2-2 jafntefli gegn Nottingham Forest um síðustu helgi.
Carragher telur að Liverpool hafi gert stór mistök með því að styrkja ekki bakvarðarstöðurnar í sumar. Conor Bradley er meiddur og Jeremie Frimpong hefur ekki fundið taktinn, en staðan hefur verið vandamál frá því Trent Alexander-Arnold fór til Real Madrid.
„Ég hef aldrei talið Szoboszlai vera miðjumann,“ sagði Carragher í Stick to Football.
Hann líkti Szoboszlai við Jordan Henderson, með hlaup, kraft og markógn, en taldi að eiginleikar hans gætu nýst betur í hægri bakverði.
Carragher sagði þó að vandamálið væri að Szoboszlai, sem er varafyrirliði liðsins, myndi líklega ekki vilja færa sig aftur í vörnina eftir að hafa nýlega skrifað undir stóran samning.
Gary Neville tók undir áhyggjurnar og sagðist undrandi á því að Liverpool hefði ekki styrkt bakvarðarstöðurnar í félagaskiptaglugganum.
