Jamie Carragher telur að Michael Carrick hafi staðið sig vel sem knattspyrnustjóri Manchester United en efast um að hann sé rétti maðurinn til að leiða félagið til sigurs í ensku úrvalsdeildinni eða Meistaradeildinni.
Carrick tók við United tímabundið eftir brottrekstur Ruben Amorim í janúar og stýrði liðinu meðal annars til sigra gegn Arsenal, Manchester City og Liverpool. Árangurinn tryggði liðinu þriðja sætið og sæti í Meistaradeildinni.
Hann fékk starfið síðan til frambúðar í sumar.
„Ég held einfaldlega ekki að Michael Carrick hafi þennan stjörnublæ sem þarf til að vinna Meistaradeildina eða ensku úrvalsdeildina,“ sagði Carragher í The Overlap Fan Debate.
Carragher telur þó að Carrick geti komið stöðugleika á félagið og fært það aftur í hóp bestu liða Evrópu.
United hefur þegar styrkt miðjuna með Andrey Santos og Youri Tielemans í sumar, en Carragher telur félagið hafa misst af góðu tækifæri þegar Mateus Fernandes fór til Tottenham.
