Valur tapaði 0-2 gegn danska liðinu Nordsjælland í fyrri leik liðanna í þriðju umferð undankeppni Sambandsdeildar Evrópu.
Leikið var að Hlíðarenda og náðu gestirnir forystunni á 29. mínútu. Villum Berthelsen skoraði þá fyrsta mark leiksins og kom Nordsjælland í 1-0.
Valsmenn reyndu að finna leiðina aftur inn í leikinn en tókst ekki að koma boltanum í netið.
Danir gerðu síðan út um leikinn þegar rúmar tíu mínútur voru eftir. Nordsjælland fékk þá vítaspyrnu og Nicklas Røjkjær steig á punktinn og skoraði af öryggi á 77. mínútu.
Lokaniðurstaðan varð því 2-0 sigur Nordsjælland og Valur þarf að vinna upp tveggja marka forskot í síðari leiknum.
Síðari leikurinn fer fram í Farum í Danmörku fimmtudaginn 13. ágúst.
