Alexander Nouri, fyrrverandi knattspyrnustjóri Werder Bremen, Herthu Berlín og Ingolstadt, hefur skipt algjörlega um starfsvettvang. Í dag rekur hann þrjá McDonald's-veitingastaði í Þýskalandi.
Nouri hætti síðast sem þjálfari gríska liðsins Kavala árið 2022. Síðan þá hefur honum borist fjöldi tilboða frá félögum í neðri deildum Þýskalands og frá Miðausturlöndum, en hann hefur hafnað þeim öllum.
„Þjálfarastarfið krefst 100 prósenta. Ef þú leggur aðeins 98 prósent í það, þá er það ekki rétt,“ sagði Nouri í viðtali við The Athletic.
Hann segir að ákvörðunin hafi verið tekin í samráði við fjölskylduna eftir mörg ár af óvissu og sífelldum flutningum.
„Við vildum byggja upp stöðugra líf. Ég áttaði mig á því að ég var tilbúinn að hefja nýjan kafla.“
Nouri segir McDonald's hafa gefið sér tækifæri til að verða frumkvöðull og byggja upp fyrirtæki til lengri tíma.
Fyrstu tveir veitingastaðir hans opnuðu í janúar og sá þriðji hefur nú bæst við. Alls starfa um 150 manns hjá fyrirtæki hans.
„Í fótboltanum skrifar maður undir þriggja ára samning en getur verið farinn eftir eitt ár. Það er erfitt fyrir fjölskylduna. Nú hef ég fundið þann stöðugleika sem ég var alltaf að leita að,“ sagði Nouri.
