Forseti knattspyrnusambands Jórdaníu, Ali prins bin Hussein, segir að FIFA hafi loks greitt út verðlaunafé sem sambandið hafði beðið eftir í átta mánuði. Hann ítrekar þó að það muni ekki breyta afstöðu sambandsins gagnvart forseta FIFA, Gianni Infantino.
Ali prins sakaði fyrr í vikunni Infantino um að hafa tafið greiðsluna og gefið í skyn að stuðningur Jórdaníu við endurkjör hans sem forseta FIFA myndi greiða fyrir lausn málsins.
„Við fengum loksins það sem leikmenn og þjálfarar áttu inni vegna úrslitaleiks Arababikarsins í Katar. Þetta er jákvætt fyrir okkar fólk, en breytir engu um alvarlegar áhyggjur okkar af stjórn FIFA,“ sagði Ali prins í yfirlýsingu.
Hann bætti við að greiðslan hefði átt að berast fyrir átta mánuðum og að sambandið myndi hvorki styðja né kjósa Infantino í komandi forsetakosningum FIFA.
FIFA greiddi fjármunina sama dag og neyðarfundur var haldinn í Marokkó þar sem æðstu stjórnendur sambandsins lýstu yfir áframhaldandi stuðningi við Infantino, sem hefur sætt harðri gagnrýni undanfarið vegna stjórnunar sinnar á alþjóðasambandinu.
