Brasilíski kantmaðurinn Savinho hefur tilkynnt Manchester City að hann vilji yfirgefa félagið í sumar til að fá meira hlutverk og halda áfram að þróast sem leikmaður.
Þetta segir félagaskiptasérfræðingurinn Fabrizio Romano, sem greinir frá því að ákvörðunin sé nú í höndum enska liðsins. Savinho telur sig þurfa meiri spilatíma en hann hefur fengið hjá City.
Tottenham hefur lengi verið orðað við hinn 22 ára gamla Brasilíumann og samkvæmt Romano er Lundúnaliðið enn með hann efstan á óskalistanum sínum. Spurs hafa fylgst grannt með stöðu hans frá því í maí og gætu nú reynt að nýta sér opnunina.
Savinho gekk til liðs við Manchester City eftir að hafa slegið í gegn á láni hjá Girona, þar sem hann var einn besti leikmaður spænsku deildarinnar. Samkeppnin um sæti í sóknarlínu City hefur hins vegar verið gríðarleg og nú virðist Brasilíumaðurinn tilbúinn að leita nýrra tækifæra annars staðar.
