Lionel Messi hefur tjáð sig í fyrsta sinn eftir að Argentína tapaði fyrir Spáni í úrslitaleik heimsmeistaramótsins.
Messi stefndi að því að leiða Argentínu til annars heimsmeistaratitils í röð en liðið laut í lægra haldi eftir framlengdan leik. Fyrirliðinn var niðurbrotinn eftir leikslok og birti síðar tilfinningaþrungin skilaboð á samfélagsmiðlum.
„Sársaukinn er gríðarlegur og þetta sár mun taka tíma að gróa,“ skrifaði Messi. Hann sagðist þó vera stoltur af liðinu sem hefði komist í tvo úrslitaleiki heimsmeistaramótsins í röð og þakkaði stuðningsmönnum fyrir ómetanlegan stuðning. Þá óskaði hann jafnframt Spánverjum til hamingju með heimsmeistaratitilinn.
Eftir leikinn vakti argentínska liðið athygli þegar leikmenn og þjálfarar sneru baki í Spánverja á meðan þeir fögnuðu með heimsmeistarabikarnum. Í stað þess gengu þeir að stúkunni þar sem argentínskir stuðningsmenn voru samankomnir.
Messi vakti einnig athygli í leiknum þegar hann reyndi að fá Marc Cucurella rekinn af velli, en án árangurs.
Argentína átti aðeins tvö skot í úrslitaleiknum og það fyrra kom ekki fyrr en á 117. mínútu. Eftir leik neituðu leikmenn liðsins jafnframt að ræða við fjölmiðla.
