Steven Gerrard hefur boðist til að aðstoða Arne Slot hjá Liverpool á meðan pressan á stjórann fer vaxandi.

Slot hefur verið undir aukinni pressu þar sem Liverpool situr í fimmta sæti ensku úrvalsdeildarinnar, þrátt fyrir að hafa unnið titilinn á síðasta tímabili. Ólíklegt er þó að félagið geri breytingar á stjórastöðunni á miðju tímabili.

Gerrard, sem er goðsögn hjá Liverpool, segir að það sé draumur sinn að stýra félaginu einn daginn, en viðurkennir að hann sé ekki tilbúinn í starfið að svo stöddu. Hann segist þó alltaf vera reiðubúinn að hjálpa félaginu ef þess er þörf.

„Ég hef frábæra tengingu við félagið og hef alltaf haft. Ef ég get hjálpað á einhvern hátt myndi ég alltaf gera það,“ sagði Gerrard í hlaðvarpi.

Liverpool á enn möguleika á árangri á tímabilinu, bæði í Meistaradeild og enska-bikarnum, og er félagið þegar farið að skipuleggja leikmannakaup í sumar í samráði við Slot.