Gianni Infantino, forseti FIFA, hefur staðfest að Íran muni taka þátt á Heimsmeistaramótinu þrátt fyrir spennu í Mið-Austurlöndum.

Infantino lét þessi orð falla í hálfleik þegar Íran vann 5-0 sigur gegn Kosta Ríka í vináttuleik í Tyrklandi. Hann sagðist ánægður með stöðu mála og að allt væri í lagi innan liðsins.

Óvissa hefur ríkt með þáttöku þeirra eftir að Bandaríkin og Ísrael hófu miklar árásír á landið.

„Íran verður á HM. Þess vegna erum við hér og við erum mjög ánægð,“ sagði Infantino. Hann bætti við að hann hefði hitt bæði leikmenn og þjálfara liðsins og að engin vandamál væru uppi.

Infantino undirstrikaði einnig að leikir Írans fari fram samkvæmt skipulagi mótsins, þar á meðal í Bandaríkjunum.

Heimsmeistaramótið hefst 11. júní og fer fram í Bandaríkjunum, Mexíkó og Kanada.