Adam Lallana segir að Roberto De Zerbi búi yfir svipaðri ástríðu fyrir fótbolta og Jürgen Klopp og geti blásið nýju lífi í Tottenham í fallbaráttunni.

Lallana, sem lék undir stjórn beggja þjálfara hjá Brighton og Liverpool, telur þó að De Zerbi muni ekki reyna að umbylta leikstíl Tottenham strax. Mikilvægast núna sé einfaldlega að halda liðinu uppi í ensku úrvalsdeildinni.

„Roberto er afar klár maður og hann veit að hann hefur ekki tíma til að reyna að spila á einhver ákveðinn hátt strax,“ sagði Lallana í samtali við talkSPORT.

„Hann skilur að hann þarf fyrst og fremst að mæta inn, hvetja hópinn áfram og ná úr honum því besta.“

Lallana segir De Zerbi vera einn mest hvetjandi stjóra sem hann hafi unnið með. Hann rifjaði upp fyrsta fund þeirra hjá Brighton og sagði að eftir aðeins fimm mínútur hafi hann verið sannfærður um hæfileika Ítalans.

Fyrrum enski landsliðsmaðurinn bar De Zerbi einnig saman við Klopp. Að hans mati eru þeir ólíkir hvað varðar taktík og leikskipulag, en deila sömu ást og ástríðu fyrir leiknum.

„Ég bar hann alltaf saman við Jürgen. Ekki endilega vegna leikstílsins, því þar eru þeir mjög ólíkir, heldur vegna ástríðunnar fyrir fótbolta. Þar eru þeir alveg eins,“ sagði Lallana.

Tottenham bindur miklar vonir við að De Zerbi geti snúið gengi liðsins við á lokakafla tímabilsins.